Interpelanca ndaj kryetarit të kuvendit të Maqedonisë së Veriut, Talat Xhaferi, sot edhe zyrtarisht arriti në duart e tij.

Nga kabineti i tij njoftojnë se ajo do të procedohet në përputhje me afatet dhe procedurat e përcaktuara me Rregulloren e Kuvendit.

Por sipas procedurave Kryeparlamentari duhet që interpelancën ta dorëzojë tek personi ndaj të cilit është drejtuar interpelanca, ndërsa më pas ky i fundit ka të drejtë që brenda 15 ditëve të dorëzojë përgjigje me shkrim tek kryetari i parlamentit. Në këtë rast të gjitha këto role i ka i njejti person”.

“Sipas Rregullores së Kuvendit të RMV-së ( neni 45, paragrafi 3), interpelanca parashtrohet deri te Kryetari i Kuvendit i cili menjëherë ia dërgon atij ndaj të cilit është drejtuar interpelanca dhe te deputetët. Subjekti, të cilit i është paraqitur interpelanca, ka të drejtë që për interpelancën e paraqitur, kryetarit të Kuvendit t’i dërgojë përgjigje me shkrim, më së voni brenda afatit prej 15 ditësh nga dita e pranimit të interpelancës ( neni 46)”, thonë nga kabineti kryeparlamentarit, informon televizioni Klan Macedonia.

Sipas rregullores diskutimi për interpelancën zgjat një ditë pune, deri sa të përfundojë lista e deputetëve të paraqitur për fjalë, kurse vendoset më së voni deri në mesnatë.

“Interpelanca vihet në rend dite në seancën e parë të rradhës të Kuvendit, pas skadimit të 15 ditëve nga dita e shpërndarjes së përgjigjes deputetëve. Nëse përgjigjja nuk dërgohet brenda afatit të parashikuar me nenin 46 të kësaj Rregulloreje, interpelanca vihet në rend dite në seancën e parë të rradhës të Kuvendit. (Neni 47)”, thonë nga kabineti i Xhaferit.

Iniciativa për interpelancë ndaj kryeparlamentarit Xhaferi, vjen nga ana e OBRM-PDUKM-së, pas publikimit të audio inçizimit ku dëgjohen fyerje dhe sharje të Xhaferit drejtuar shërbimeve të Kuvendit, si dhe pas mbylljes së deputetëve në sallën plenare, me kërkesë të kryeparlamentarit.

Kryeparlamentari Xhaferi tha se me mbylljen e dyerve, nuk ka shkelur rregulloren, ndërsa as me fyerjet dhe sharjet nuk ka shkelur kodin etik të sjelljes.

Arsyetohet se ka reaguar ashtu ndaj papërgjegjësisë së shërbimeve.